Zëvendëskryeministrja, njëherësh Ministër i Infrastrukturës dhe Energjisë,Znj.Belinda Balluku ishte në Azerbajxhan ku mori pjesë në Ministerialin e 10-të të Korridorit Jugor të Gazit, njëkohësisht edhe Ministerialin e dytë për energjinë e gjelbërt.
Gazifikimi ishte në fokus të këtij takimi, ku i pranishëm ishte edhe Kryeministri Edi Rama, i ftuar i Presidentit Ilham Alijev. Gazi mbetet një burim i rëndësishëm energjie dhe në këtë pikë Shqipëria ka hedhur hapa para sa i takon procesit të gazifikimit, me mbështetjen e Azerbajxhanit.
“Është diskutuar gjatë dhe gjerë përsa i përket të gjithë prioriteteve që kanë të bëjnë me gazifikimin e disa prej vendeve kryesore apo edhe me linjat e transmetimit të gazit të cilat tashmë janë konkrete dhe operojnë në të gjithë Europën. Por pas agresionit rus në Ukrainë gazi ka qenë një nga çështjet më të rëndësishme të diskutuara përsa i përket furnizimit për të gjithë Europën, por sigurisht dhe krijimit të depozitave të sigurisë, pasi sot flitet gjerësisht për një axhendë të gjelbër që Shqipëria sigurisht kryeson ashtu si dhe vendet skandinave duke qenë se prodhimi jonë është i bazuar 100% mbi burimet  e rinovueshme. Por nga ana tjetër, krijimi i infrastrukturës së gazit dhe krijimi i një mundësie për të pasur burime alternative sigurisht do ti jepte Shqipërisë, por edhe rajonit një siguri më të lartë energjetike”, tha Balluku në një prononcim për mediat.

Gazifikimi ka një ndikim të madh në rritjen e sigurisë energjitike për Shqipërine dhe rajonin, duke e bërë vendin një aktor të rëndësishëm në tregun energjitik dhe duke diversifikuar burimet e furnizimit me energji.

Duke investuar në infrastrukturë dhe duke u lidhur me projekte ndërkombëtare. Shqipëria mund të kontribuojë në krijimin e një tregu energjitik të qëndrueshëm, të sigurt dhe të diversifikuar në Ballkanin Perëndimor.